Puneeth Rajkumar : కన్నడ కంఠీర‌వ రాజ్ కుమార్ మూడో త‌న‌యుడు పునీత్ రాజ్ కుమార్ కొద్ది సేప‌టి క్రితం గుండెపోటుతో కన్నుమూశారు. జిమ్‌లో ఎక్సర్‌సైజ్ చేస్తోన్న సమయంలో ఆయనకు గుండెపోటు సంభవించినట్లు తెలిపారు. ఆయనను హుటాహుటిన విక్రమ్ ఆసుపత్రికి తరలించారు. పునీత్ ఆరోగ్య ప‌రిస్థితి విష‌మించ‌డంతో కొద్ది సేప‌టి క్రితం ఆయ‌న కన్నుమూశారు.
పునీత్ రాజ్‌కుమార్‌కు జూనియర్ ఎన్టీఆర్‌తో సన్నిహిత సంబంధం ఉంది. ఇద్దరి మధ్య స్నేహబంధం ఉంది. పునీత్ రాజ్ కుమార్ నటించిన చక్రవ్యూహ సినిమా కోసం ఎన్టీఆర్ ఓ పాటను కూడా పాడారు. కన్నడిగులు ప్రత్యక్ష దైవంలా ఆరాధించే రాజ్కుమార్ మూడో కుమారుడు పునీత్. మొదటి కుమారుడు శివరాజ్ కుమార్ కన్నడ చలన చిత్ర సీమలో సూపర్ స్టార్‌గా వెలుగొందుతున్నారు. నటసార్వభౌమ, చక్రవ్యూహ, రణవిక్రమ, దొడ్మనె హుడుగ, పవర్.. వంటి సూపర్ హిట్ సినిమాల్లో నటించారు పునీత్ రాజ్కుమార్.
పునీత్ మృతితో శాండ‌ల్‌వుడ్ పరిశ్రమ దిగ్భ్రాంతికి గురైంది. క‌ర్నాట‌క అంతా హై అల‌ర్ట్ ప్ర‌క‌టించారు. థియేట‌ర్స్ అన్నీ మూసివేశారు. ఆసుప‌త్రి వద్ద భారీగా పోలీసులు మోహ‌రించారు. హ‌స్పిట‌ల్ ప్ర‌ధాన మార్గాల‌లో భ‌ద్ర‌తను క‌ట్టుదిట్టం చేశారు. కంఠీర‌వ స్టేడియానికి పునీత్ భౌతిక కాయం త‌ర‌లించ‌నున్నారు. ఆయ‌న మృతితో సినీ పరిశ్రమ శోక‌సంద్రంలో మునిగింది.
