బీహార్‌లో ఏం జ‌రుగుతుందో తెలియ‌డం లేదు కానీ ఇటీవ‌లి కాలంలో కొంద‌రి ఖాతాల్లో కోట్ల రూపాయ‌ల్లో డ‌బ్బు జ‌మ అవుతోంది. బ్యాంకులో ఏర్ప‌డిన సాంకేతిక సమస్య లేదా ఇతర కార‌ణాలు ఏమున్నాయో తెలియ‌దు. కానీ కొంద‌రి ఖాతాల్లో ఈ మ‌ధ్య కాలంలో కోట్ల రూపాయ‌లు జ‌మ అయ్యాయి. అలాగే తాజాగా ఓ రైతు ఖాతాలో ఏకంగా రూ.52 కోట్లు జ‌మ అయ్యాయి. దీంతో అత‌ను, అధికారులు షాక్ తిన్నారు.
బీహార్‌లోని ముజ‌ఫ‌ర్‌పూర్ జిల్లా క‌తిహార్ పోలీస్ స్టేష‌న్ ప‌రిధిలో ఉన్న ఓ గ్రామానికి చెందిన రామ్ బ‌హ‌దూర్ షా అనే రైతుకు నెల నెలా పెన్ష‌న్ వ‌స్తోంది. అందులో భాగంగానే పెన్ష‌న్ వ‌చ్చిందా, రాలేదా ? అన్న విష‌యాన్ని తెలుసుకునేందుకు అత‌ను స‌మీపంలో ఉన్న క‌స్ట‌మ‌ర్ స‌ర్వీస్ పాయింట్ (సీఎస్‌పీ) వ‌ద్ద‌కు వెళ్లాడు.
సీఎస్‌పీ వ‌ద్ద ఉద్యోగులు అత‌ని ఖాతాను చెక్ చేశారు. అందుకుగాను ఆధార్ బ‌యోమెట్రిక్ తీసుకున్నారు. అయితే రామ్ బ‌హ‌దూర్ షా ఖాతాలో ఏకంగా రూ.52 కోట్లు ఉండ‌డాన్ని చూసి అంద‌రూ ఖంగు తిన్నారు. అంత మొత్తం ఆ రైతు ఖాతాలోకి ఎలా వ‌చ్చిందో తెలియ‌డం లేదు. దీనిపై పోలీసులు కేసు న‌మోదు చేసుకుని ద‌ర్యాప్తు చేప‌ట్టారు.
అయితే ఆ రైతు మాత్రం త‌న జీవితం దుర్భ‌రంగా మారింద‌ని, క‌నుక ఆ మొత్తంలో కొంత డ‌బ్బును త‌న ఖాతాలో అలాగే ఉంచాల‌ని.. దీంతో త‌న జీవితం బాగు ప‌డుతుంద‌ని అధికారుల‌ను వేడుకుంటున్నాడు. అయినా వారు అత‌ని మాట విన‌రు క‌దా. అయితే ఈ విధంగా చాలా మంది ఖాతాల్లో కోట్ల రూపాయ‌ల డ‌బ్బు ఎందుకు జ‌మ అవుతుందో అర్థం కావ‌డం లేదు. దీనిపై త్వ‌ర‌లోనే వివ‌రాలు తెలియ‌నున్నాయి.
