దేశవ్యాప్తంగా కరోనా బాధితుల సంఖ్య రోజురోజుకు పెరుగుతున్న నేపథ్యంలో ఆక్సిజన్ కొరత తీవ్రస్థాయిలో ఏర్పడింది. ఈ క్రమంలోనే ఆక్సిజన్ ఉత్పత్తి సామర్థ్యం పెంచడానికి ప్రభుత్వం చర్యలను వేగవంతం చేసింది. ఇతర దేశాల నుంచి యుద్ధ విమానాల ద్వారా ఆక్సిజన్ ను దిగుమతి చేసుకుంటుంది.ప్రస్తుతం ఉన్న ఈ విపత్కరమైన పరిస్థితులలో ఆక్సిజన్ కొరత ఏర్పడి ఆక్సిజన్ సిలిండర్లు లేనప్పుడు నెబ్యులైజర్ ను వాడవచ్చు అనే వార్త సోషల్ మీడియాలో హల్ చల్ చేసింది.
ఆక్సిజన్ సిలిండర్ లేనప్పుడు నెబ్యులైజర్ ఏవిధంగా ఉపయోగించుకోవాలో చెబుతూ డా. అలోక్‌ సేథి అనే మెడికల్‌ ప్రాక్టీషనర్‌ ట్విటర్‌లో పోస్టు చేసిన వీడియో సోషల్ మీడియాలో వైరల్ గా మారింది. అయితేప్రస్తుతం ఉన్న ఈ పరిస్థితులలో ఇది ఎంతో ప్రయోజనకరంగా ఉంటుందని చాలా మంది భావిస్తున్నప్పటికీ దీనివల్ల ఎన్నో ప్రమాదాలు తలెత్తుతాయని నిపుణులు హెచ్చరిస్తున్నారు.
నెబ్యులైజర్ కేవలం ఆస్తమా వల్ల ఊపిరి సరిగా ఆడని వారు ఈ పరికరాన్ని ఉపయోగించడం వల్ల వాయునాళాలు ఏర్పడిన అడ్డంకులను తొలగించి శ్వాస క్రియకు ఆటంకం లేకుండా కలుగజేస్తాయి. అంతే కానీ మన శరీరంలో ఆక్సిజన్ స్థాయిలు తగ్గిపోయినప్పుడు నెబ్యులైజర్ ఆక్సిజన్ అందించదని ఈ విధంగా నెబ్యులైజర్ వాడటం వల్ల అనేక సమస్యలను కొని తెచ్చుకున్నట్లే అవుతుందని నిపుణులు హెచ్చరిస్తున్నారు.
