Chaurasia : హైదరాబాద్ మహానగరంలో కేబీఆర్ పార్క్కి ఓ విశిష్టత ఉంది. ఎంతో ఆహ్లదంగా ఉండే ఈ పార్క్కి నిత్యం చాలా మంది వాకింగ్కి వస్తూ ఉంటారు. సెలబ్స్ కూడా ఈ పార్క్లో వాకింగ్ తో పాటు పలు వ్యాయామాలు చేస్తుంటారు. అయతే ఇక్కడ పలుమార్లు దాడులు జరిగిన విషయం తెలిసిందే. తాజాగా ఓ నటిపై దాడి చేసి మొబైల్ ఫోన్ ఎత్తుకెళ్లాడు ఓ దుండగుడు.
వాకింగ్ కు వెళ్లిన సినీనటి చౌరాసియాపై గుర్తు తెలియని వ్యక్తి దాడికి పాల్పడ్డాడు. ఆదివారం రాత్రి 8:30 గంటల సమయంలో కేబీఆర్ పార్క్ వద్ద ఈ సంఘటన చోటుచేసుకుంది. ఈ దాడిలో నటి చౌరాసియా గాయపడినట్లు పోలీసులు తెలిపారు. బంజారాహిల్స్ కేబీఆర్ పార్క్ రోడ్ నంబర్ 9 వద్ద చౌరాసియా ఆదివారం సాయంత్రం వాకింగ్కు వెళ్లింది. అక్కడ ఓ దుండగుడు తనపై దాడిచేశాడు.
ఆమె డయల్ 100కు సమాచారం ఇవ్వడంతో పోలీసులు ఘటనా స్థలానికి చేరుకున్నారు. స్వల్పంగా గాయపడ్డ ఆమెను స్థానికంగా ఉన్న ప్రైవేటు ఆస్పత్రికి తరలించారు. కాగా, ఈ ఘటనకు సంబంధించి పోలీసులు కేసు నమోదు చేసుకుని దర్యాప్తు చేపట్టారు. ఈ ఘటన ఇప్పుడు వాకింగ్ కి వెళ్లే వారిలో భయాందోళనలను కలిగిస్తోంది.