Kantara Chapter 1 First Look : చిన్న సినిమాగా విడుద‌లై పెద్ద విజ‌యం సాధించిన చిత్రం కాంతార. రిషబ్ శెట్టి స్వీయ ద‌ర్శ‌క‌త్వంలో రిలీజై బ్లాక్బస్టర్ హిట్గా నిలిచిన ‘కాంతార’ సినిమాకు ప్రీక్వెల్గా కాంతార చాప్టర్ 1 చిత్రం రూపొందుతుంది. ఇటివ‌లే షూటింగ్ మొదలుపెట్టిన చిత్రబృందం ఈ సినిమా నుంచి బిగ్ అప్‌డేట్‌ను అందించింది. కాంత‌ర ఛాప్ట‌ర్ 1 నుంచి ఫస్ట్ లుక్‌ను విడుద‌ల చేసింది. దీనితో పాటు ఒక టీజర్ కూడా విడుద‌ల చేసింది చిత్రబృందం. వెలుగు చూపించనిలేని ఎన్నో రహస్యాలను చీకటి బయటపెడుతోంది. వాటిని చూసి తట్టుకోవడానికి సిద్ధంగా ఉండాలనేది ఆసక్తిని రేకెత్తించే డైలాగ్. అడవి నేపథ్యంలో పౌర్ణమి చంద్రుడు .. ప్రళయకాల రుద్రుడిలా కథానాయకుడు కనిపిస్తున్నాడు.
కాంతార’లో కథ ఆరంభంలో ఒక రాజు అడవిలోని గిరిజన ప్రజలకు భూమిని దానంగా ఇస్తాడు. అంతకు ముందు నుంచి ఈ కథ మొదలవుతుంది. రిషబ్ శెట్టి క్లైమాక్స్ సీన్‌తో ఫస్ట్ లుక్ టీజర్ మొద‌లుకాగా.. కదంబాల పాలన సమయంలో ఒక లెజెండ్‌ జన్మించాడు అంటూ కండలు తిరిగిన దేహంతో.. బాడి అంతా రక్తపు మరకలు బీభత్సంగా ఉన్న తండ్రి పాత్రలో ఉన్న రిషబ్ శెట్టి క‌నిపించ‌డం టీజ‌ర్‌కి హైలైట్‌గా మారింది. ప్రీక్వెల్ సినిమాలో రిషబ్ తండ్రి జీవితం, ఆయన చనిపోయి ఎక్కడికి వెళ్ళారు, ఆ పల్లె సంప్రదాయాల వెనుక మూలం ఎక్కడ మొదలయ్యింది, దేవుడు ప్రత్యేకంగా ఒక తెగవాళ్లనే ఎందుకు పూనుతాడు లాంటి అంశాలను హైలెట్ చేసి చూపించబోతున్నట్లు టాక్‌. తొలిపార్టును రూ.16 కోట్లలోపే ముగించిన రిషబ్.. ప్రీక్వెల్ కోసం ఏకంగా రూ.120 కోట్ల బడ్జెట్‌ను ప్లాన్ చేస్తున్న‌ట్టు స‌మాచారం.
కాంతార చాప్టర్-1 చిత్రానికి కూడా హీరో రిషబ్ శెట్టినే కథ, దర్శకత్వం వహిస్తున్నారు. హొంబాలే ఫిల్స్మ్ పతాకంపై విజయ్ కిరంగదూర్ ఈ చిత్రం నిర్మిస్తుండ‌గా, అజ్నిశ్ లోకనాథ్ సంగీతం అందిస్తున్నారు. కాంతార చాప్టర్ 1 చిత్రాన్ని కన్నడతో పాటు తెలుగు, హిందీ, తమిళం, మలయాళం, బెంగాలీ, ఇంగ్లిష్ భాషల్లో ఒకేసారి రిలీజ్ చేయాలని మేకర్స్ ప్లాన్ చేశారు. వచ్చే ఏడాది ఈ చిత్రం రిలీజ్ కానుంది.
