Posani Krishna Murali : పవన్ వర్సెస్‌ వైసీపీ నుంచి పవన్ వర్సెస్‌ పోసానిగా మారిన మాటల యుద్ధం చివరకు దాడుల వరకు వెళ్లింది. పవన్ అభిమానులు పోసానిపై దాడులు చేసినట్లుగా ఆరోపణలు వస్తున్నాయి. పోసాని ఇంటిపై బుధవారం అర్థరాత్రి కొందరు గుర్తు తెలియని వ్యక్తులు రాళ్ల దాడి చేశారు. అయితే ఆ సమయంలో ఇంట్లో ఎవరూ లేకపోవడంతో ప్రమాదం తప్పింది.
ఇదే విషయమై పోసాని ఇంటి వాచ్‌ మెన్‌ మాట్లాడుతూ.. అర్థరాత్రి సమయంలో కొందరు పోసాని ఇంటిపై రాళ్ల దాడి చేశారని, దీంతో ఇంటి కిటికీ అద్దాలు ధ్వంసమయ్యాయని అన్నాడు. అయితే ఈ ఘటనపై వాచ్‌మెన్‌ ఎస్సార్‌ నగర్‌ పోలీసులకు ఫిర్యాదు చేశాడు.
దీనిపై స్థానికులు స్పందిస్తూ.. అర్థరాత్రి సమయంలో రాళ్ల దాడి జరగడంతో భయాందోళనలకు గురయ్యామని తెలిపారు. పవన్ కల్యాణ్‌ అభిమానులే ఈ విధంగా చేసి ఉంటారని వారు ఆరోపిస్తున్నారు. అయితే పవన్‌పై తీవ్రమైన వ్యాఖ్యలు చేసినప్పటి నుంచి పోసాని అమీర్‌పేటలోని ఎల్లారెడ్డి గూడలో ఉన్న తన ఇంట్లో నివాసం ఉండడం లేదని, ఆయన వేరే చోటకు మారారని తెలుస్తోంది.
కాగా పోలీసులు ఫిర్యాదును స్వీకరించి కేసు నమోదు చేసుకుని దర్యాప్తు చేపట్టారు. అక్కడి పరిసరాల్లో ఉన్న సీసీటీవీ ఫుటేజ్‌లను వారు పరిశీలిస్తున్నారు. నిందితులను గుర్తించే పనిలో పడ్డారు.
