IND Vs ENG : బ‌ర్మింగ్ హామ్ వేదిక‌గా జ‌రిగిన రెండో టీ20 మ్యాచ్ లో భార‌త్ విజ‌య దుందుభి మోగించింది. ఇంగ్లండ్‌పై 49 ప‌రుగుల తేడాతో ఘ‌న విజ‌యం సాధించింది. భార‌త్ నిర్దేశించిన ల‌క్ష్యాన్ని ఛేదించ‌డంలో ఇంగ్లండ్ త‌డ‌బ‌డింది. పేక‌మేడ‌లా ఆ జట్టు వికెట్ల‌ను కోల్పోయింది. భార‌త బౌల‌ర్ల ధాటికి ఇంగ్లండ్ బ్యాట్స్‌మెన్ విల‌విల్లాడిపోయారు. ఈ క్ర‌మంలోనే ఎప్ప‌టిక‌ప్పుడు వికెట్ల‌ను కోల్పోయారు. దీంతో భార‌త్ ఇంగ్లండ్‌పై సునాయాసంగా విజ‌యం సాధించింది. సిరీస్‌ను కైవ‌సం చేసుకుని 2-0 ఆధిక్యంలో నిలిచింది.
మ్యాచ్‌లో టాస్ గెలిచిన ఇంగ్లండ్ ముందుగా ఫీల్డింగ్ ఎంచుకోగా భార‌త్ బ్యాటింగ్ చేసింది. ఈ క్ర‌మంలోనే భార‌త్ నిర్ణీత 20 ఓవ‌ర్ల‌లో 8 వికెట్ల న‌ష్టానికి 170 ప‌రుగులు చేసింది. భార‌త బ్యాట్స్‌మెన్‌ల‌లో ర‌వీంద్ర జ‌డేజా, కెప్టెన్ రోహిత్ శ‌ర్మ, రిషబ్ పంత్‌లు రాణించారు. 29 బంతుల్లో జ‌డేజా 5 ఫోర్ల‌తో 46 ప‌రుగులు చేసి నాటౌట్ గా నిల‌వ‌గా.. రోహిత్ శ‌ర్మ 20 బంతుల్లో 3 ఫోర్లు, 2 సిక్స‌ర్ల‌తో 31 ప‌రుగులు చేశాడు. పంత్ 15 బంతుల్లో 4 ఫోర్లు, 1 సిక్స‌ర్‌తో 26 ప‌రుగులు చేశాడు. ఇక ఇంగ్లండ్ బౌల‌ర్ల‌లో క్రిస్ జోర్డాన్ 4 వికెట్లు ప‌డ‌గొట్ట‌గా రిచ‌ర్డ్ గ్లీస‌న్ 3 వికెట్లు తీశాడు.
అనంత‌రం బ్యాటింగ్ చేసిన ఇంగ్లండ్ ఆరంభం నుంచి త‌డ‌బ‌డింది. వ‌రుస‌గా వికెట్ల‌ను కోల్పోతూనే వచ్చింది. ఈ క్ర‌మంలోనే ఇంగ్లండ్ 17 ఓవ‌ర్ల‌లోనే 121 ప‌రుగులు మాత్ర‌మే చేసి ఆలౌట్ అయింది. ఆ జట్టు బ్యాట్స్‌మెన్‌ల‌లో మొయిన్ అలీ (35 ప‌రుగులు), డేవిడ్ విల్లీ (33 నాటౌట్) త‌ప్ప మిగిలిన ఎవ‌రూ ఆక‌ట్టుకునే ప్ర‌ద‌ర్శ‌న చేయ‌లేదు. కాగా భార‌త బౌల‌ర్ల‌లో భువ‌నేశ్వ‌ర్ కుమార్ 3 వికెట్లు ప‌డ‌గొట్టాడు. జ‌స్‌ప్రిత్ బుమ్రా, య‌జువేంద్ర చాహ‌ల్ చెరో 2 వికెట్లు తీశారు. హార్దిక్ పాండ్యా, హ‌ర్ష‌ల్ ప‌టేల్‌లు చెరొక వికెట్ చొప్పున తీశారు. ఇక ఈ మ్యాచ్‌లో విజ‌యంతో భార‌త్ ఇప్ప‌టికే సిరీస్‌ను కైవ‌సం చేసుకోగా.. ఈ సిరీస్‌లో చివ‌రిదైన మూడో మ్యాచ్ ఆదివారం నాటింగామ్‌లో జ‌ర‌గ‌నుంది.
