Chiranjeevi : మెగాస్టార్ చిరంజీవి బర్త్ డే వేడుకలకు రంగం సిద్ధమవుతోంది. ఇటు కుటుంబ సభ్యులు, అటు అభిమానులు భారీ ఎత్తున నిర్వహించేందుకు ప్లాన్ చేస్తున్నారు. ఆగస్టు 22న చిరంజీవి పుట్టినరోజును రెండు తెలుగు రాష్ట్రాల్లో పండుగలా నిర్వహిస్తామని ఫ్యాన్స్ అంటున్నారు. అదేవిధంగా చిరంజీవి బర్త్ డే వేడుకలను ఈ నెల 22న హైదరాబాద్ నగరంలోని హైటెక్స్ నిర్వహిస్తామని మెగా బ్రదర్ నాగబాబు తెలిపారు.
మెగాస్టార్ చిరంజీవి రెండు సంవత్సరాలుగా పుట్టిన రోజు వేడుకలకు దూరంగా ఉన్నారు. కానీ ఈసారి మాత్రం గట్టిగా ప్లాన్ చేశారు. వారం రోజుల నుండే చిరంజీవి పుట్టిన రోజు వేడుకలకు సంబంధించిన పనులు జరుగుతున్నాయి. ప్రస్తుతం తెలుగు రాష్ట్రాల్లో పలు చోట్ల రక్తదాన శిబిరాలు, పలు సేవా కార్యక్రమాలను నిర్వహిస్తూ ఉన్నారు. అందుకు సంబంధించిన ఏర్పాట్లను చిరంజీవి ఫ్యాన్స్ అసోసియేష‌న్ల అధ్యక్షులు పర్యవేక్షిస్తున్నారు.
అన్నయ్య (చిరంజీవి) బర్త్‌డే సందర్భంగా ఈ నెల 22న హైదరాబాద్ హైటెక్స్‌లో కార్నివాల్‌ ఫెస్టివల్‌ నిర్వహిస్తున్నాం అని నాగబాబు అన్నారు. గురువారం ఆయన విలేకరులతో మాట్లాడుతూ.. ప్రతి సంవత్సరం అన్నయ్య బర్త్‌డేని శిల్పకళా వేదికలో చేసేవాళ్లం. అయితే ఈ ఏడాది ఫ్యాన్స్ కోసం హైటెక్స్‌లో కార్నివాల్‌ ఫెస్టివల్‌ నిర్వహిస్తున్నాం. ఈ వేడుకలో చిరంజీవి గురించి ఎవరికీ తెలియని విషయాలు పంచుకుంటాను. ఈ ఫెస్టివల్‌కి మా ఫ్యామిలీ నుంచి అందరు హీరోలు హాజరవుతారు. అలాగే ఇతర హీరోలు, ఆయన్ని అభిమానించేవారు కూడా పాల్గొంటారు. ఈ ఫెస్టివల్‌కి అన్ని ప్రాంతాల మెగా అభిమానులు తప్పకుండా రావాలి అన్నారు నాగబాబు.
టాలీవుడ్ వర్గాల ద్వారా అందుతున్న సమాచారం ప్రకారం తెలుగు రాష్ట్రాల్లోనే కాకుండా ప్రపంచ వ్యాప్తంగా మెగాస్టార్ చిరంజీవి పుట్టిన రోజు వేడుకలు నిర్వహించేందుకు దాదాపుగా అయిదు కోట్ల వరకు ఖర్చు అవుతూ ఉంటుందని.. అదంతా స్థానిక ఫ్యాన్స్ ఖర్చు పెట్టనున్నట్లు తెలుస్తోంది. అభిమాన సంఘం పేరుతో సేవా కార్యక్రమాలు చేయడం హర్షించదగ్గ విషయం. మొత్తానికి మెగా పండుగ కాస్త ఖరీదైనప్పటికీ అభిమానులు ఆనందించేదిగా ఉంటుందని విశ్లేషకులు అంటున్నారు. చూడాలి మెగా ఫ్యాన్స్ హంగామా ఆ రోజు ఎలా ఉంటుందో..!
