చల్ల చల్లని వాతావరణంలో వేడి వేడి చిక్కుడు గారెలు ఇలా త‌యారు చేసుకోండి..!

వర్షాకాలంలో చల్ల చల్లని వాతావరణంలో ఎవరికైనా వేడివేడిగా కారం కారంగా తినాలనిపిస్తుంది. ఈ విధంగా చల్లని వాతావరణంలో వేడి వేడిగా నోరూరించే చిక్కుడు గారెలు తయారు చేసుకుని తింటే ఎంతో అద్భుతంగా ఉంటుంది. మరింకెందుకాలస్యం చిక్కుడు గారెలు ఎలా తయారు చేసుకోవాలో ఇక్కడ తెలుసుకుందాం.

కావలసిన పదార్థాలు:

*ఒక కప్పు చిక్కుడు గింజలు

*అల్లం చిన్న ముక్క

*పచ్చి మిరపకాయలు 10

*ఉల్లిపాయ ముక్కలు అర కప్పు

*పుదీనా కొద్దిగా

*పచ్చి కరివేపాకు

*కొత్తిమీర గుప్పెడు

*ఉప్పు తగినంత

*బేకింగ్ సోడా చిటికెడు

*నూనె డీప్ ఫ్రైకి సరిపడినంత

*బియ్యంపిండి మూడు టేబుల్ స్పూన్లు

తయారీ విధానం

పచ్చి చిక్కుడుగింజల, పచ్చిమిర్చి, ఉల్లిపాయ ముక్కలు, ఉప్పు వేసి మిక్సీలో మెత్తగా గ్రైండ్ చేసి పెట్టుకోవాలి. ఈ మిశ్రమంలోకి పుదీనా, కరివేపాకు, కొత్తిమిర, బియ్యపు పిండి వేసి కలుపుకోవాలి. ఈ మిశ్రమంలోకి చిటికెడు బేకింగ్ సోడా వేసి మిశ్రమం మొత్తం బాగా కలిసేలా తయారు చేసుకోవాలి. స్టవ్ మీద కడాయిలో నూనె వేసి వేడి చేయాలి. నూనె వేడి అయిన తర్వాత కొద్ది కొద్దిగా ఈ మిశ్రమాన్ని తీసుకొని గారెలుగా వేసుకోవాలి. అటు ఇటు తిప్పుతూ ఎర్రగా అయ్యే వరకు కాల్చి తీసేయాలి. ఈ విధంగా వేడి వేడిగా ఉండే చిక్కుడు గారెలను టమోటో చట్నీ, లేదా టమోటో కెచప్ తో తింటే అద్భుతమైన రుచిని కలిగి ఉంటాయి.