చిన్నారులకు పుట్టు వెంట్రుకలను తీయడం అనేది హిందూ సాంప్రదాయంలో ఉంది. హిందువులందరూ ఈ ఆచారాన్ని పాటిస్తూ వస్తున్నారు. అయితే చిన్నారులకు పుట్టు వెంట్రుకలను ఎందుకు తీస్తారు ? ఎప్పుడు తీస్తారు ? దాని వల్ల ఏమేం ప్రయోజనాలు ఉంటాయి ? అన్న వివరాలను ఇప్పుడు తెలుసుకుందాం.
హిందూ ధర్మం ప్రకారం చిన్నారులకు పుట్టు వెంట్రుకలను తీయడాన్ని చూడాకరణము అని అంటారు. హిందూ ధర్మంలో పదహారు రకాల సంస్కారాలు ఉంటాయి. వాటిలో చూడాకరణము కూడా ఒకటి. చూడ అంటే శిఖ (పిలక) అని అర్థం వస్తుంది. ఆ శిఖను ఉంచుకొని మిగిలిన వెంట్రుకలను తీసి వేయడాన్ని “చూడాకరణం” అని అంటారు. ఈ సంస్కారం వల్ల పిల్లలకు బలం, ఆయుష్షు, వర్చస్సు కలుగుతాయని చెబుతారు.
పిల్లలకు మొదటి సంవత్సరంలో కానీ, మూడవ సంవత్సరంలో కానీ ఈ సంస్కారాన్ని నిర్వహించాల్సి ఉంటుంది. అయితే పుట్టినప్పటి నుంచి మూడేళ్ల వరకు ఏడాదికి ఒకసారి వెంట్రుకలను తీయాలని కూడా కొందరు పండితులు చెబుతారు. అయితే పుట్టు వెంట్రుకలను దాదాపుగా చాలా మంది పూర్తిగా తీసేస్తారు. కానీ ధర్మం ప్రకారం పిలకలా ఉంచి మిగిలిన వెంట్రుకలను తీయాలి. ఇది తెలియకపోవడం వల్ల చాలా మంది మొత్తం వెంట్రుకలను తీస్తున్నారు.