కామాక్షి దీపం ఎలా వెలిగించాలో తెలుసా ?

సాధారణంగా మన హిందూ సాంప్రదాయాల ప్రకారం దీపం వెలిగించడం ఒక ఆనవాయితీగా వస్తోంది. ప్రతిరోజు మన ఇంట్లో పూజ గదిలో ఉదయం సాయంత్రం దీపారాధన చేస్తూ దేవుడిని ప్రార్థిస్తాము. ఈ విధంగా దీపారాధన చేయడం వల్ల దీపపు నుంచి వచ్చే వెలుతురు మన చుట్టూ కమ్ముకున్న చీకటిని తొలగిస్తుందని భావిస్తాము.అయితే ఈ విధంగా దీపారాధన చేయడానికి ఎన్నో రకాల దీపాలు ఉన్నాయి. అలాంటి దీపాలలో కామాక్షి దీపం ఒకటి. కామాక్షి దీపం అంటే ఏమిటి? ఈ దీపం విశిష్టత ఏమిటి? ఎలా వెలిగించాలి అనే విషయాలను ఇక్కడ తెలుసుకుందాం.

కామాక్షి దీపం అన్ని దీపాల మాదిరి కాకుండా విభిన్నంగా ఉంటుంది. ఈ దీపపు ప్రమిదకు గజలక్ష్మి ముఖచిత్రం ఉంటుంది కనుక దీనిని గజలక్ష్మి దీపం అని, కామాక్షి దీపం అని పిలుస్తారు. ఈ దీపాన్ని ఎంతో విలువైన ఆభరణంగా భావిస్తారు. ముఖ్యంగా ఈ దీపాన్ని ఏదైన వ్రతాలు చేసేటప్పుడు, గృహప్రవేశం చేసేటప్పుడు, శుభకార్యాలు జరిగేటప్పుడు ఎక్కువగా వెలిగిస్తారు. కామాక్షి దీపం వెలిగించడం వల్ల సర్వ సంపదలు అష్టైశ్వర్యాలు కలుగుతాయని పండితులు చెబుతున్నారు.

ఈ దీపం వెలిగించే టప్పుడు ముందుగా దీపపు ప్రమిద కు, కామాక్షి అమ్మవారికి పసుపు కుంకుమలతో బొట్లు పెట్టి పువ్వులతో అలంకరించాలి. ఈ దీపాన్ని వెలిగించే టప్పుడు తప్పనిసరిగా నువ్వుల నూనెను ఉపయోగించాలి. కామాక్షి దీపాన్ని వెలిగించే వారు కేవలం ఒకే వత్తితో దీపాన్ని వెలిగించాలి.రోజూ సాయం సంధ్య సమయంలో లక్ష్మీ తామర వత్తులను వాడి కామాక్షి దీపాన్ని వెలిగిస్తే అష్టైశ్వర్యాలు చేకూరుతాయని పండితులు తెలియజేస్తున్నారు.