ఎరుపు రంగు కొండ చిలువ‌.. భారీ ధ‌ర‌కు అమ్మ‌బోయి అరెస్ట‌య్యారు..

కొన్ని ర‌కాల ప్ర‌త్యేక‌మైన పాములను ఇంట్లో ఉంచుకున్నా, వాటికి పూజ‌లు చేసినా అదృష్టం, ధ‌నం క‌ల‌సి వ‌స్తాయ‌ని ఇప్ప‌టికీ కొంద‌రు న‌మ్మేవారు ఉన్నారు. అలాంటి వారినే ల‌క్ష్యంగా చేసుకుని కొందరు అరుదైన జాతికి చెందిన పాముల‌ను స్మ‌గ్లింగ్ చేస్తున్నారు. తాజాగా ఇలాంటిదే ఓ సంఘ‌ట‌న ఉత్త‌ర‌ప్ర‌దేశ్‌లో చోటు చేసుకుంది. వివ‌రాల్లోకి వెళితే..

ఉత్త‌ర‌ప్ర‌దేశ్‌లోని దుధ్వా అట‌వీ ప్రాంతంలో ఎరుపు రంగులో ఉండే కొండ చిలువ‌ను స్మ‌గ్లింగ్ చేస్తున్న న‌లుగురు వ్య‌క్తుల‌ను పోలీసులు అదుపులోకి తీసుకున్నారు. వారి నుంచి ఆ పామును స్వాధీనం చేసుకుని అట‌వీ శాఖ అధికారుల‌కు అప్ప‌గించారు. ఆ వ్య‌క్తుల‌ను పోలీసులు శాలు క‌శ్య‌ప్, ముకేష్ క‌శ్య‌ప్‌, సందీప్ సింఘాల‌లుగా గుర్తించారు. వీరికి అఫ్స‌ర్ అనే డ్రైవ‌ర్ స‌హ‌కారం అందించాడు. వారు ఆ పామును ఓ కారులో స్మ‌గ్లింగ్ చేస్తుండ‌గా పోలీసులు రెడ్ హ్యాండెడ్‌గా ప‌ట్టుకుని అరెస్టు చేశారు.

వారంద‌రూ ఢిల్లీకి చెందిన వారు కాగా దుధ్వా అట‌వీ ప్రాంతానికి స‌మీపంలో ఉన్న ఖెరి అనే గ్రామంలో వారు ఆ పామును స్థానికంగా ఉన్న ఓ వ్య‌క్తి నుంచి రూ.10 ల‌క్ష‌ల‌కు కొన్నారు. దాన్ని ముంబైలో రూ.50 ల‌క్ష‌ల‌కు అమ్మాల‌ని నిర్ణయించుకున్నారు. ఈ క్ర‌మంలోనే వారు పోలీసుల‌కు ప‌ట్టుబ‌డ్డారు.

కాగా ఎరుపు రంగులో ఉండే ఆ కొండ చిలువ తోక కూడా త‌ల‌లాగే ఉంటుంది. దీంతో దాన్ని మొద‌టి సారి చూస్తే దానికి రెండు త‌ల‌లు ఉన్నాయేమోన‌ని ఎవ‌రైనా సరే అనుకుంటారు. ఇక ఈ పాముల‌కు చైనాతోపాటు ప‌లు ఆసియా దేశాల్లో మంచి డిమాండ్ ఉంది. వీటిని ఇంట్లో పెట్టుకుంటే ధ‌నవంతులు అవుతార‌ని కొంద‌రు ఇప్ప‌టికీ విశ్వ‌సిస్తున్నారు.