వివాహేతర సంబంధం ఓ మహిళ ప్రాణాల మీదకు తెచ్చింది. చక్కగా పెళ్లయి ఇద్దరు పిల్లలతో సుఖంగా సాగిపోవాల్సిన ఆమె జీవితం.. వేరొక వ్యక్తిపై మోజుతో కన్న పిల్లలను కాదనుకుని అతని చెంతకు చేరింది. ప్రియుడితో ఎనిమిది సంవత్సరాల పాటు సహజీవనం చేసిన ఆమె తనను పెళ్లి చేసుకోవాలని అతనిని నిలదీయడంతో చివరికి అతను ఆమెపై హత్యాయత్నం చేసిన ఘటన శ్రీకాకుళం జిల్లా టెక్కలి మండలం మేఘవరం పంచాయతీ బొరిగిపేట గ్రామంలో చోటు చేసుకుంది. పూర్తి వివరాల్లోకి వెళితే..
బొరిగిపేట గ్రామానికి చెందిన సంపతిరావు దేవరాజ్ అనే వ్యక్తి గంగాధరపేటకు చెందిన కమలలు పెళ్లికి ముందే ప్రేమించుకున్నారు. అయితే కమలకు మరొక వ్యక్తితో పెళ్లి చేయడంతో పెళ్లి అయినప్పటికీ ప్రియుడిపై ఉన్న మోజుతో నిత్యం తనని కలుస్తూ అతనితో ఎంతో సన్నిహితంగా ఉండేది. ఈ క్రమంలోనే కమలకు ఇద్దరు కుమారులు జన్మించిన తర్వాత తన ప్రియుడిపై మోజుతో తన పిల్లలను వదిలి టెక్కలికి వచ్చింది. అయితే అప్పటికే తన ప్రియుడికి పెళ్లయి ఇద్దరు సంతానం ఉన్నారు.
ఈ విషయాన్ని తన భార్యకు తెలియకుండా కమలను ఒక అద్దె ఇంట్లో పెట్టి గత ఎనిమిది సంవత్సరాల నుంచి ఆమెతో సహజీవనం చేస్తున్నాడు. తనని పెళ్లి చేసుకోవాలని ఎన్నోసార్లు పెళ్లి ప్రస్తావన దేవరాజ్ దగ్గర కమల ప్రస్తావించడంతో తరచూ వీరి మధ్య గొడవలు జరిగేవి. ఈ క్రమంలోనే దేవరాజ్ ఎలాగైనా ఆమెను వదిలించుకుంటే తనకు ప్రశాంతత దొరుకుతుందని భావించి ఆమెకు మాయమాటలు చెప్పి ద్విచక్రవాహనంపై ఎక్కించుకొని బొరిగి పేట గ్రామ శివారుకు తీసుకెళ్లి ఆమెపై కత్తితో దాడి చేశాడు. తీవ్ర గాయాలపాలైన ఆమె సొమ్మసిల్లి పడిపోతే చనిపోయిందని భావించి అక్కడి నుంచి పరారయ్యాడు. కొన ఊపిరితో కొట్టుమిట్టాడుతున్న కమల స్పృహలోకి రాగానే స్థానికుల సహాయంతో టెక్కలి ఆస్పత్రిలో చికిత్స పొందుతూ పోలీసులకు ఫిర్యాదు చేసింది. ఈ క్రమంలోనే పోలీసులు కేసు నమోదు చేసుకుని దర్యాప్తు కొనసాగిస్తున్నారు.
