Sim Cards : దేశంలోని మొబైల్ ఫోన్ వినియోగ‌దారుల‌కు డిపార్ట్‌మెంట్ ఆఫ్ టెలిక‌మ్యూనికేష‌న్స్ (డాట్‌) హెచ్చ‌రిక‌లు జారీ చేసింది. ప్ర‌స్తుతం దేశంలో చాలా మంది 9 సిమ్ కార్డుల క‌న్నా ఎక్కువ సంఖ్య‌లో కార్డుల‌ను వాడుతున్నార‌ని గుర్తించింది. దీంతో అలాంటి సిమ్‌ల‌న్నీ ఇక‌పై ప‌నిచేయ‌కుండా పోనున్నాయి. ఈ మేర‌కు టెలికాం శాఖ ఉత్త‌ర్వులు జారీ చేసింది.
దేశంలో ఇక‌పై 9 క‌న్నా ఎక్కువ సంఖ్య‌లో సిమ్‌కార్డుల‌ను వాడ‌డం కుద‌ర‌దు. అదే జ‌మ్మూ కాశ్మీర్‌, ఈశాన్య రాష్ట్రాలు, అస్సాంల‌లో అయితే 6 క‌న్నా ఎక్కువ సంఖ్య‌లో సిమ్ కార్డుల‌ను వాడ‌రాదు. ఒక వేళ వాడ‌ద‌లిస్తే డిసెంబ‌ర్ 7న టెలికాం శాఖ నోటిఫికేష‌న్ ఇచ్చిన‌ప్ప‌టి నుంచి 60 రోజుల్లోగా పౌరులు తాము వాడుతున్న సిమ్ కార్డుల‌ను రీ వెరిఫికేష‌న్ చేయించుకోవాల్సి ఉంటుంది. ఆలోగా రీ వెరిఫికేష‌న్ చేయించుకోక‌పోతే అలాంటి సిమ్ కార్డుల‌ను డీయాక్టివేట్ చేయ‌నున్నారు. ఈ మేర‌కు టెలికాం స‌ర్వీస్ ప్రొవైడ‌ర్ల‌కు ఆ శాఖ స్ప‌ష్ట‌మైన ఆదేశాలను జారీ చేసింది.
దేశంలో చాలా మంది లెక్క‌కు మించి సిమ్ కార్డుల‌ను వాడుతున్నార‌ని టెలికాం శాఖ తెలియ‌జేసింది. అయితే కొంద‌రు అలాంటి సిమ్‌ల‌తో చ‌ట్ట వ్య‌తిరేక కార్య‌క‌లాపాల‌కు పాల్ప‌డుతున్నార‌ని.. అందువ‌ల్లే ఈ నిర్ణ‌యం తీసుకున్నామ‌ని వెల్ల‌డించింది.
అయితే అంగ వైక‌ల్యం ఉన్న‌వారికి, హాస్పిట‌ల్‌లో చేరి చికిత్స పొందుతున్న వారికి, విదేశాల్లో ఉన్న‌వారికి 60 రోజులు కాకుండా అద‌నంగా మ‌రో 30 రోజుల స‌మ‌యం ఇస్తున్న‌ట్లు టెలికాం శాఖ తెలియ‌జేసింది. క‌నుక 9 క‌న్నా ఎక్కువ సంఖ్య‌లో సిమ్ కార్డులు ఉన్న‌వారు వెంట‌నే రీ వెరిఫికేష‌న్ చేయించుకోండి. లేదంటే ఆ కార్డులు డీయాక్టివేట్ అయిపోతాయి.
