భాద్రపద మాసంలో శుక్ల పక్ష చతుర్దశి రోజు వినాయక చవితి పండుగను ఎంతో ఘనంగా జరుపుకుంటారు. ఈ పండుగ రోజు భక్తులు పెద్ద ఎత్తున స్వామి వారి విగ్రహాలను ప్రతిష్టించి స్వామివారికి ఎంతో ప్రీతికరమైన నైవేద్యాలను సమర్పించి పూజా కార్యక్రమాలను నిర్వహిస్తారు. ఈ ఏడాది వినాయక చవితి పండుగ సెప్టెంబర్ 10వ తేదీ శుక్రవారం వచ్చింది. మరి ఈ పండుగ రోజు ఏ విధమైన పనులు చేయాలి, ఏ పనులు చేయకూడదు.. అనే విషయాలను తెలుసుకుందామా..!
చేయాల్సిన పనులు
వినాయక చవితి రోజు ఇంట్లో వినాయక విగ్రహాన్ని ప్రతిష్టించే వాళ్ళు సూర్యోదయానికి కంటే ముందుగా నిద్రలేచి ఇంటిని శుభ్రం చేసి తలంటు స్నానం చేసి వినాయకుడి పూజా కార్యక్రమాలను ప్రారంభించాలి. వినాయకుడిని ప్రతిష్ఠించి పూజా సమయం వరకు వినాయకుడి ముఖం కనిపించకుండా ఎర్రని వస్త్రం కప్పి వేయాలి. ముఖ్యంగా వినాయకుడి విగ్రహాన్ని తీసుకువచ్చే వారు స్వామివారి తొండం ఎడమవైపు ఉండేది తీసుకోవాలి. పూజా కార్యక్రమాన్ని మొదలు పెట్టే సమయంలో శుద్ధమైన గంగాజలంతో స్వామివారి విగ్రహాన్ని తుడిచి నుదుటిపై సిందూరం పెట్టి పూజా కార్యక్రమాలను ప్రారంభించాలి. పూజ సమయంలో స్వామివారికి బంతి పువ్వులను సమర్పించి, స్వామి వారికి ఎంతో ఇష్టమైన ఉండ్రాళ్ళు, కుడుములను నైవేద్యంగా సమర్పించాలి. స్వామివారి అలంకరణ అనంతరం విఘ్నేశ్వరుని మంత్రాలను జపిస్తూ విగ్రహాన్ని 3, 5, 7, 9, 11 రోజుల పాటు ఇంట్లో ఉంచుకుని పూజ చేయవచ్చు. ఎవరి స్థోమతకు తగినట్లుగా వారు దానధర్మాలు చేయడం వల్ల శుభం కలుగుతుంది. ఈ విధంగా వినాయకుడి పూజ చేసేటప్పుడు తప్పనిసరిగా ఈ నియమాలను పాటించాలి.
చేయకూడని పనులు
వినాయక చవితి రోజు ఇంట్లో వినాయకుడి విగ్రహం ప్రతిష్టించే వారు ఎప్పుడు కూడా బాత్రూం గోడకు దగ్గరగా, మెయిన్ గేట్ ఎంట్రెన్స్ లో, ఇంట్లోకి ప్రవేశించే మార్గంలో, హాల్ లో వినాయకుడి విగ్రహాలను ప్రతిష్టించకూడదు. అదేవిధంగా నాట్యమాడుతూ ఉన్న వినాయక విగ్రహాన్ని తీసుకుని పూజ చేయకూడదు. ఇక వినాయకుడి నిమజ్జనం చేసే సమయంలో నేరుగా కుటుంబ సభ్యులు నిమజ్జనం చేయకుండా పెద్ద విగ్రహాలను ప్రతిష్ఠించే చోటపెట్టి ఆ వినాయకుడితో పాటు ఈ విగ్రహాలను నిమజ్జనం చేయాలి. అలాగే నిమజ్జనం చేసే సమయంలో స్వామివారి అలంకరణలో ఉపయోగించే పుష్పాలు అన్నింటినీ తొలగించే నిమజ్జనం చేయాలి.
