Sania Mirza : టెన్నిస్‌లో అంతర్జాతీయ స్టార్‌గా సానియా మీర్జా ఎంతో గుర్తింపు తెచ్చుకుంది. పలు టైటిల్స్‌ను కూడా సాధించింది. అయితే ఇటీవల ఆమె తన రిటైర్మెంట్‌ నిర్ణయాన్ని ప్రకటించింది. ఈ ఏడాది తనకు చివరిదని తెలియజేసింది. అయితే రిటైర్మెంట్‌ ఎందుకు తీసుకుంటుందో తాజాగా ఆమె వివరించింది. ఈ మేరకు ఆమె ఓ జాతీయ మీడియా సంస్థకు ఇచ్చిన ఇంటర్వ్యూలో వివరాలను వెల్లడించింది.
తనకు ప్రస్తుతం 35 సంవత్సరాలని.. అంతేకాకుండా తనకు మూడు పెద్ద సర్జరీలు జరిగాయని సానియా మీర్జా తెలిపింది. ఈ క్రమంలో ఫిట్‌నెస్‌ కోసం చాలా శ్రమించాల్సి వస్తుందని పేర్కొంది. రెండు సార్లు తన మోకాలికి, ఒకసారి మణికట్టుకు సర్జరీలు జరిగాయని తెలియజేసింది. ఈ క్రమంలోనే తన శరీరం ప్రస్తుతం సహకరించడం లేదని తెలిపింది.
అలాగే తనకు 3 ఏళ్ల కొడుకు ఉన్నాడని, అతన్ని చూసుకోవడంతోపాటు శరీరం తిరిగి కోలుకునేందుకు కొంత సమయం పడుతుందని తెలిపింది. అందుకనే రిటైర్మెంట్‌ ప్రకటించానని చెప్పుకొచ్చింది. అయితే తన రిటైర్మెంట్‌ నిర్ణయం ఎంతో మందిని బాధించిందని, చాలా మంది తనకు మెసేజ్‌ చేశారని.. ఈ ఏడాది చివరి వరకు ఆడేందుకు ప్రయత్నిస్తానని ఆమె తెలిపింది.
