ముంబైలో దారుణ‌మైన సంఘ‌ట‌న చోటు చేసుకుంది. ఆడ‌పిల్ల పుట్టింద‌ని అత్తింటి వారు త‌ర‌చూ వేధింపుల‌కు గురి చేస్తుండ‌డంతో.. ఆ మ‌హిళ త‌న 3 నెల‌ల ప‌సికందును చంపేసింది. ఈ సంఘ‌ట‌న‌కు సంబంధించి వివ‌రాలు ఇలా ఉన్నాయి.
ముంబైలోని కాలాచౌకీ ప్రాంతంలో ఉన్న సంఘ‌ర్ష్ స‌ద‌న్ బిల్డింగ్‌లో ఓ కుటుంబం నివాసం ఉంటోంది. ఆ కుటుంబానికి చెందిన 36 ఏళ్ల మ‌హిళ‌కు కుటుంబ స‌భ్యులు ఇప్ప‌టికే 3 సార్లు అబార్ష‌న్ చేశారు. ఆమెకు ఆడ‌పిల్ల పుడుతుంద‌ని అంజ‌నం వేసిన మాంత్రికులు చెప్ప‌గా.. ఆడ‌పిల్ల వ‌ద్ద‌నుకున్న ఆ కుటుంబ స‌భ్యులు ఆమెకు అబార్ష‌న్ చేయించారు.
అయితే ఇప్పుడు ఆమె 4వ సారి గ‌ర్భం దాల్చింది. కానీ ఈసారి బిడ్డ‌ను క‌నాల‌ని కుటుంబ స‌భ్యులు చెప్పారు. అయితే ఆ మ‌హిళ ఆడ‌పిల్ల‌కు జ‌న్మ‌నిచ్చింది. దీంతో గ‌త 3 నెల‌ల నుంచి ఆమెను అత్తింటివారు వేధింపుల‌కు గురి చేయ‌సాగారు.
ఆడ‌పిల్ల‌ను క‌న్నావ‌ని త‌ర‌చూ ఆ మ‌హిళ‌ను నిందిస్తూ వేధించ‌సాగారు. దీంతో తీవ్ర మ‌న‌స్థాపం చెందిన ఆ మ‌హిళ త‌న బిడ్డ‌ను తానే చంపుకుంది. నీళ్ల ట్యాంకులో ముంచి ప్రాణాల‌ను తీసింది. కానీ అంద‌రికీ త‌న బిడ్డ‌ను ఎవ‌రో కిడ్నాప్ చేశార‌ని చెప్పింది. దీంతో పోలీసులు కేసు న‌మోదు చేసి ద‌ర్యాప్తు చేప‌ట్టారు. అయితే ఆ మ‌హిళ నేరం తానే చేశాన‌ని అంగీక‌రించింది. దీంతో ఆమెను రిమాండ్‌కు త‌ర‌లించారు.
