Vivek : పాపుల‌ర్ క‌మెడియ‌న్ కరోనా టీకా వ‌ల్ల చ‌నిపోయాడా..? నిజం ఏంటి ?

Vivek : కరోనా కాలంలో ఎంతో మంది ప్ర‌ముఖులు క‌న్నుమూసిన విష‌యం తెలిసిందే. త‌మిళ హాస్య న‌టుడు వివేక్ గుండె పోటుతో మృతి చెందారు. వివేక్‌ దాదాపుగా 300కి పైగా చిత్రాల్లో నటించారు. దర్శక శిఖరం కె. బాలచందర్‌ పరిచయం చేసిన నటుల్లో వివేక్‌ ఒకరు. ‘మనదిల్‌ ఉరుది వేండం’ సినిమా ద్వారా ఈయన సినీ అరంగేట్రం చేశారు. అంద‌రు స్టార్ హీరోలతో ప‌ని చేసిన ఆయ‌న అపరిచితుడులో విక్రమ్‌ స్నేహితుడిగా క‌నిపించి మెప్పించారు.

ర‌జ‌నీకాంత్ శివాజీలో ఆయ‌న‌కు మేనమామగా, ‘రఘు వరన్‌ బీటెక్‌’లో ధనుష్‌ సహచరుడిగా ‘స్వర్ణపుష్పం’ అంటూ ఫోన్‌లో మాట్లాడుతూ ప్రేక్షకుల్ని నవ్వించారు. హీ‌రో సూర్యతో కలిసి ‘సింగం 2’లో ఎస్‌ఐ పాత్రలో మెప్పించారు. ‘బాయ్స్‌’ చిత్రంలోనూ నటించారు. చ‌నిపోయే ముందు కోవిడ్ టీకా తీసుకున్న ఆయ‌న‌.. ‘ప్రతి ఒక్కరూ టీకా తీసుకొని, సామాజిక దూరం పాటిస్తూ జాగ్రత్తగా ఉండాలి’ అని కోరారు.

కరోనా వ్యాక్సిన్ తీసుకున్న రెండు రోజులకే వివేక్‌ చనిపోవడంతో.. టీకా వికటించి ఆయన మృతి చెందారనే అనుమానాలు రేకెత్తాయి. దీంతో తమిళనాడులోని విజుపురానికి చెందిన ఓ సామాజిక కార్యకర్త.. టీకా పొందడం వల్లే వివేక్‌ చనిపోయారా? అనే కోణంలో విచారణ జరపాలని మానవ హక్కుల కమిషన్‌లో పిటిషన్ దాఖలు చేశారు. విచార‌ణ అనంతంరం కేంద్ర ఆరోగ్యమంత్రిత్వ శాఖ స్ప‌ష్ట‌తనిస్తూ.. ఆయ‌న గుండె పోటు వ‌ల్ల‌నే మృతి చెందాడ‌ని పేర్కొంది. దీంతో అంద‌రిలో అనుమానాలు తొల‌గిపోయాయి.