Power Star : తమిళ యాక్టర్, డాక్టర్ పవర్ స్టార్ శ్రీనివాసన్ కు ఉన్నఫలంగా హార్ట్ ఎటాక్ రావడంతో ఆయనను కుటుంబ సభ్యులు చెన్నైలోని ఓ ప్రైవేట్ ఆస్పత్రిలో చేర్పించి చికిత్స అందిస్తున్నట్లు తెలుస్తోంది. హై బ్లడ్ ప్రెజర్ కారణంగా ఒక్కసారిగా హార్ట్ ఎటాక్ వచ్చిందని కుటుంబసభ్యులు తెలియజేస్తున్నారు. ప్రస్తుతం ఆయనకు చికిత్స కొనసాగుతుందని, ఆయన ఆరోగ్య పరిస్థితి విషమంగానే ఉందని తెలుస్తోంది.

తమిళ ఇండస్ట్రీలో పవర్ స్టార్ గా ఎంతో మంచి పేరు ప్రఖ్యాతలు సంపాదించుకున్న శ్రీనివాసన్ మొట్టమొదటిసారిగా ఇండస్ట్రీకి లతిక అనే సినిమా ద్వారా అడుగు పెట్టారు. ఆ తరువాత ఎన్నో విభిన్న కథాంశాలతో తెరకెక్కిన సినిమాలలో నటించి మంచి ప్రేక్షకాదరణ సంపాదించుకున్న పవర్ స్టార్ ప్రస్తుతం అనారోగ్యానికి గురైనట్లు తెలుస్తోంది.
ఇలా ఎంతో పాపులారిటీ సంపాదించుకున్న పవర్ స్టార్ ఒక కేసులో జైలు పాలయ్యారు. ఈ క్రమంలోనే గత కొన్ని రోజుల వరకు ఇండస్ట్రీకి దూరంగా ఉన్న శ్రీనివాసన్ తాజాగా పికప్ డ్రాప్ అనే సినిమాలో చేస్తున్నారు. ఈ సినిమాకు తానే దర్శకత్వం వహించడం గమనార్హం. ఇకపోతే ప్రస్తుతం ఈయన తీవ్రమైన గుండెపోటుతో ఆస్పత్రిలో ఉన్నారని తెలియడంతో అభిమానులు ఆందోళన వ్యక్తం చేస్తున్నారు.