Huzurabad : హుజురాబాద్ ఉప ఎన్నిక ఓట్ల కౌంటింగ్‌కు స‌ర్వం సిద్ధం అయింది. నువ్వా నేనా అన్న‌ట్లుగా సాగిన ప్ర‌చారం అనంత‌రం పోలింగ్ నిర్వ‌హించారు. ఈ క్ర‌మంలోనే గ‌తంలోక‌న్నా 2 శాతం ఎక్కువ‌గానే ఈ సారి హుజురాబాద్‌లో పోలింగ్ న‌మోదు అయింది. మొత్తం 86.33 పోలింగ్ శాతం న‌మోదైంది. దీంతో గెలుపు త‌మ‌దంటే త‌మ‌ది అంటూ.. అభ్య‌ర్థులు ఎవ‌రికి వారు ధీమాగా ఉన్నారు. ఈ క్ర‌మంలో ఉప ఎన్నిక ఫ‌లితంపై మ‌రికొద్ది గంటల్లో ఉత్కంఠ వీడ‌నుంది. 6 నెల‌ల నుంచి జ‌రిగిన రాజ‌కీయ పోరాటంలో గెలుపు ఎవ‌రిదో తేలిపోనుంది.
హుజురాబాద్ ఉప ఎన్నిక ఓట్ల కౌంటింగ్‌కు సంబంధించి అధికారులు అన్ని ఏర్పాట్లు పూర్తి చేశారు. క‌రీంన‌గ‌ర్‌లోని ఎస్ఆర్ఆర్ డిగ్రీ కాలేజ్ లో ఓట్ల‌ను లెక్కించ‌నున్నారు. ఇందుకు గాను 2 కౌంటింగ్ హాల్స్ ను ఏర్పాటు చేశారు. ముందుగా 753 పోస్ట‌ల్ బ్యాలెట్ ఓట్ల‌ను లెక్కిస్తారు. ఈ క్ర‌మంలో కౌంటింగ్ మంగ‌ళ‌వారం ఉద‌యం 8 గంట‌ల‌కు ప్రారంభం కానుంది.
2 కౌంటింగ్ హాల్స్ లో ఓట్ల‌ను లెక్కిస్తారు. వాటిల్లో 14 టేబుల్స్ ను ఏర్పాటు చేశారు. మొత్తం 22 రౌండ్ల‌లో కౌంటింగ్ పూర్త‌వుతుంది. ఒక్కో రౌండ్‌కు 14 ఈవీఎంల‌లోని ఓట్ల‌ను లెక్కిస్తారు. ఈ క్ర‌మంలో మ‌ధ్యాహ్నం 3 గంట‌ల‌కు ఫ‌లితం వెల్ల‌డి కానుంది.
కాగా హుజురాబాద్ నియోజ‌క‌వ‌ర్గంలో హుజురాబాద్ మండలంలోని ఓట్ల‌ను 6 రౌండ్ల‌లో లెక్కిస్తారు. అలాగే వీణ‌వంక మండ‌లం ఓట్ల‌ను 4 రౌండ్ల‌లో, జ‌మ్మికుంట మండలంలోని ఓట్ల‌ను 5 రౌండ్ల‌లో, ఇల్లంత‌కుంట మండలంలోని ఓట్ల‌ను 3 రౌండ్ల‌లో, క‌మ‌లాపూర్ మండలంలోని ఓట్ల‌ను 4 రౌండ్ల‌లో లెక్కిస్తారు. కాగా ఇప్ప‌టికే హుజురాబాద్ ఉప ఎన్నిక ఫ‌లితం ప‌ట్ల స‌ర్వ‌త్రా ఉత్కంఠ నెల‌కొన‌గా.. మ‌రికొన్ని గంటల్లో ఆ ఉత్కంఠ‌కు తెర ప‌డ‌నుంది.
