గీత గోవిందం మూవీ స్టైల్‌లో బస్సులో యువతికి ముద్దు పెట్టిన యువకుడు.. వెంటనే బస్సు దిగి పరార్‌.. వేట కొనసాగిస్తున్న పోలీసులు..

సినిమాల్లో చూపించే సన్నివేశాలను కొందరు అనుకరించేందుకు యత్నిస్తుంటారు. అయితే కొన్ని ప్రమాదకరంగా ఉంటే కొన్ని మాత్రం రొమాంటిక్‌ సీన్లు ఉంటాయి. నిజ జీవితంలో వాటిని అనుకరించేందుకు కూడా చాలా మంది యత్నిస్తుంటారు. ఈ క్రమంలోనే ఓ యువకుడు కూడా అలాగే చేశాడు. కాకపోతే అతను ఆ పని చేసినందుకు పోలీసులు అతని వెంట పడుతున్నారు. ఇంతకీ అసలు ఏం జరిగిందంటే..

బెల్లారి నుంచి బెంగళూరుకు ఓ యువతి అక్కడి కేఎస్‌ఆర్‌టీసీ లగ్జరీ బస్సులో ప్రయాణం అయింది. అయితే మార్గ మధ్యలో పీన్యా-జలహల్లి వద్ద బస్సు విరామం కోసం ఆగింది. ఆ సమయంలో ఆ యువతి నిద్ర పోతోంది. అదే అదునుగా భావించిన ఓ యువకుడు ఆమె బుగ్గపై ముద్దు పెట్టుకుని అక్కడి నుంచి వెంటనే పరారయ్యాడు.

విషయాన్ని గ్రహించిన ఆ యువతి వెంటనే మేల్కొని బయటకు పరిగెత్తింది. కానీ అప్పటికే ఆ యువకుడు అక్కడి నుంచి పారిపోయాడు. అతను బస్సు ఎక్కేటప్పుడు ఆ యువతి పక్కనే కూర్చున్నాడు. మార్గ మధ్యలో ప్రయాణంలో అతను తన వైపే తీక్షణంగా చూశాడని ఆ యువతి పోలీసులకు ఇచ్చిన ఫిర్యాదులో పేర్కొంది. దీంతో పోలీసులు కేసు నమోదు చేసుకుని ఆ యువకుడి కోసం వేట కొనసాగిస్తున్నారు. బస్సు ప్రయాణించిన రూట్లలో ఉన్న సీసీటీవీ కెమెరాల ఫుటేజ్‌లను వారు పరిశీలిస్తున్నారు. త్వరలోనే ఆ యువకున్ని పట్టుకుంటామని పోలీసులు తెలిపారు.