యువ కథానాయకుడు యష్ హీరోగా దర్శకుడు ప్రశాంత్ నీల్ దర్శకత్వంలో తెరకెక్కిన కేజిఎఫ్ చిత్రం ప్రేక్షకులను ఎంతగా ఆకట్టుకుందో ప్రత్యేకంగా చెప్పాల్సిన పనిలేదు. బంగారు గనుల నేపథ్యంలో తెరకెక్కిన ఈ సినిమా దేశవ్యాప్తంగా సంచలనం సృష్టించింది. తొలి భాగానికి జాతీయస్థాయిలో మంచి ఆదరణ లభించడంతో ఈ సినిమాకి సీక్వెల్ చిత్రాన్ని తెరకెక్కిస్తున్నారు.
కెజిఎఫ్ 2 దాదాపు 80 శాతం షూటింగ్ పూర్తి చేసుకుంది. ఈ సినిమా కోసం దేశవ్యాప్తంగా ఎంతో మంది అభిమానులు ఆసక్తిగా ఎదురు చూస్తున్నారు. ఈ క్రమంలోనే ఈ సినిమాలో యువతరాన్ని ఉర్రూతలూలించేలా ఓ ప్రత్యేక పాటను సిద్ధం చేసినట్లు తెలుస్తోంది. అయితే ఈ పాటలో డాన్స్ చేయడం కోసం బాలీవుడ్ భామ జాక్వలిన్ ఫెర్నాండెజ్ ప్రత్యేక పాటలో చేయనున్నట్లు తెలుస్తోంది. ఈమెతో పాటు యువ నాయిక నోరా ఫతేహి పేరు కూడా వినబడుతుంది.
గతంలో జాక్వెలిన్ హౌస్‌ఫుల్‌, భాగీ-2, సాహో వంటిసినిమాలలో ప్రత్యేక పాటలో నటించడంతో బాలీవుడ్ తో పాటు దక్షిణాదిలో కూడా ఈమెకు మంచి ఆదరణ లభించింది. కేజిఎఫ్ మొదటి భాగంలో ప్రత్యేక పాటలో తమన్నా, హిందీ వెర్షన్ లో మౌని రాయ్ నటించారు.అయితే సీక్వెల్ చిత్రంలో కూడా ప్రత్యేక పాటలో ఇద్దరు నాయకులతో ప్లాన్ చేస్తున్నట్లు తెలుస్తోంది.
