NTR : ఈ మధ్య మన హీరోలు ఆసుపత్రుల చుట్టూ తిరుగుతుండడం అభిమానులలో ఆందోళన కలిగిస్తోంది. సాయిధరమ్ తేజ్ నుండి మొదలు పెడితే అడివి శేష్, రామ్, చిరంజీవి, బాలకృష్ణ వంటి వారు పలు కారణాలతో ఆసుపత్రిలో చికిత్స పొందారు. తాజాగా యంగ్ టైగర్ ఎన్టీఆర్ జిమ్లో గాయపడ్డట్టు వార్తలు వినిపిస్తున్నాయి. మూడు, నాలుగు రోజుల క్రితం జిమ్లో ఎన్టీఆర్ కుడి చేతి వేలికి గాయం అయిందట.
వెంటనే ఆయన చేతికి చిన్నపాటి సర్జరీ చేయగా, కొద్ది రోజులు ఇంట్లో ఉండమని వైద్యులు సూచనలు కూడా చేశారట. ప్రస్తుతం ఎన్టీఆర్ క్షేమంగానే ఉన్నట్టు తెలుస్తోంది. దీపావళి సందర్భంగా తన తనయులతో కలిసి దిగిన ఫొటోని ఎన్టీఆర్ షేర్ చేయగా, ఇందులో ఎన్టీఆర్ కుడి చేతి వేలికి కట్టు ఉండడం మనం గమనించవచ్చు. అయితే ఇదేమి అంత మేజర్ గాయం కాదని సన్నిహితులు అంటున్నారు.
ఎన్టీఆర్ కొద్ది రోజులుగా ఎవరు మీలో కోటీశ్వరులు ప్రోగ్రాంతో బిజీగా ఉన్నారు. ఈ షో చివరి దశకు చేరుకుంది. త్వరలోనే ఆయన కొరటాల శివ కాంబినేషన్లో వచ్చే ఓ సినిమాలో నటించనున్నారు. దీంతోపాటు ప్రశాంత్ నీల్ దర్శకత్వంలో మరో సినిమాకు సంతకం చేశారు. ఈ సినిమాలు పాన్ ఇండియా చిత్రాలుగా రూపొందనున్నాయని సమాచారం.